الوطن

فولاذ يالمعدنك ياصوت يجدح وطن
همك يضل بالگلب لا الف كيلو وطن
شرفتنه هاي الارض رجلينه بيهه وطن
تسألني عنه منو راح اخجل واعرگ
محلاه هذا الوطن بديانته واعراگ
ياصاح هذا الفخر هذا البطل العراگ
بيه انجمع هالشعب من كل كتر طائفه
وبماي دجله ارتوه وذنوبه بي طائفه
ولگبر حيدر علي هذا الوطن طائفه
گالو يموت الخبر عدوانك الشيعته
وانوب شيعو خبر ابنائه الشيعته
لا ما يموت الوطن ما طول بي شيعته
لا ما يموت الوطن بشيعته وسنته
الفتنه سيف الغدر فوگ الرگب سنته
من نسو بابل امس اول شرع سنته
شگد قاد هذا الشعب ضعن الصبر وحده
خلونه نعقد صلح وايد اللي بي وحده
صدگوني هذا الوطن ما ينبني وحده
ما ينبني لوحده يبنيه كل الشعب
والعيب منه طلع شحچي شگولن شعب
مدرشه صار الوطن والناس بيه الشعب
دروس من الوفه فو?گ الصبر علمه
ميزه عن الامم بكل النعم علمه
غصبن على كل خشم عالي يضل علمه
بس عيب هذا الوطن ما شفنه بي راحه
والموت چل عالزلم چن يطحن براحه
شيفيد بعد الندم وصك الوجه راحه
صدگ تره اليخذلك يا موطني تربان
وعيوني يمك تضل و لشوفتك تربان
غيرك الي ما يصح لا ماي لا تربان
و عگبك اضن ما يصح يجمع الوادم وطن

وهاي الابوذيه
عراق ودونك الوادم بلادين
وصدگني اليخذلونك بلا دين
لگلبي ابد ما يحصل بلادينا
و غير تراب ما يحصل اليه
مع تحياتي الشاعر مروان القيسي